काठमाडौं । प्रदर्शनको पूर्वसन्ध्यामा फिल्म ‘जारी २ : सङ अफ च्याब्रुङ’ लाई राजधानीको एक हलमा भव्य प्रिमियर गरिएको छ ।यो सिनेमाको रिलिजको पूर्वसन्ध्यामा हिजो कमलपोखरीस्थित बिग मूभिजमा प्रिमियर शोको आयोजना गरिएको थियो ।
कवि उपेन्द्र सुब्बाको निर्देशनमा निर्माण भएको सिनेको प्रिमियर शोमा सिनेमाकर्मी र रंगपत्रकारको बाक्लो उपस्थिति रहेको थियो । प्रिमियर शोमा पुगेका अधिकांशले लिम्बु संस्कृतिमा आधारित सिनेमा उत्कृष्ट बनेको प्रतिक्रिया दिएका थिएका छन् । यो सिनेमाले माओवादी जनयुद्ध ताका कसरी धर्म संस्कृति संकटमा परेको थियो भन्ने पक्षलाई उत्कृष्ट ढंगले प्रस्तुत गरेको प्रतिक्रिया उपस्थित दर्शकहरुको थियो ।
उपेन्द्र सुब्बा निर्देशित फिल्मलाई बाँसुरी फिल्म्सका रामबाबु गुरुङसहितले निर्माण गरेका हुन् । यो फिल्म नेपालसहित अन्तर्राष्ट्रिय बजारमा पनि शुक्रबारदेखि नै प्रदर्शनमा आएको छ । सिनेमा हेर्न विघठित प्रतिनिधि सभाकी उपसभामुख इन्दिरा राना मगर पनि पुगेकी थिइन् ।
उनले सिनेमा हेरिसकेपछि मिडियासँग प्रतिक्रिया दिँदै भनिन्, ‘मैले जारीको पहिलो भाग पनि हेरेकी थिए । आज दोस्रो भाग पनि हेर्न पाए । निकै खुशी लाग्यो । यो सिनेमाले राम्रो सन्देश दिएको छ । त्यसमाथी पहिलो भाग फरक कालखण्डको सेटअपमा निर्माण गरिएको छ । जसलाई निर्देशकले सुन्दर ढंगले पस्किनु भएको छ । मलाई मन पर्यो । दर्शकलाई पनि मन पर्ने छ । सवैले एक पटक हुर्नु होला ।’
प्रिमियरमा विशेषगरी अभिनेत्री मिरूना मगरको लिम्बु संस्कृति झल्कने पहिरनले धेरैको ध्यान तानेको थियो।
फिल्म नेपालमा उच्च शोसहित प्रदर्शनमा आएको हो। विशेषगरी पूर्वी नेपालका हलमा फिल्मको व्यापार आक्रामक हुने देखिएको छ।
